ILOILO CITY- Ginkumpirma ni Sta. Barbara Councilor kag ex-officio Board Member Ramon Sullano nga magapa-reelect ini bilang Philippine Councilors’ League (PCL)- Iloilo Chapter President.
Sa interview sang Bombo Radyo kay Sullano, iya ginpahayag nga natalana ang eleksyon para sa bag-o nga set sang PCL- Iloilo officer sa Agusto 30.
Suno sa opisyal, sa subong, gina-finalize pa niya ang iban niya nga kaupdanan nga magapadalagan sa eleksyon para sa iban nga posisyon nga amo ang Vice President, Secretary General, Treasurer, Auditor, Business Manager, P.R.O., kag walo ka Board of Directors.
Pahayag sang natungdan, wala pa sang ginabati-bati nga magapadalagan man sa pinakamataas nga posisyon kontra sa iya.
Nahibaluan nga nagpagwa ang Department of Interior and Local Government (DILG) sang memorandum nga nagamando nga kinahanglan nga makapatigayon sang PCL election sa tunga sang Hulyo tubtob Septyembre 2022.
