ILOILO CITY – Ginpasidunggan sang Sumakwelan Iloilo, Incorporated ang mga indibidwal nga naghatag sang dungog sa pulong nga Hiligaynon.
Sa interview sang Bombo Radyo kay Dr. Eleonora Padilla, Pangulo sang Sumakwelan Iloilo, Incorporated, iya ginpahayag nga nagapanikasog sila nga maghimo ang mga aktibidad agud mapadayon ang pulong nga namat-an.
Suno kay Padilla, 76 ka tuig na ang nasambit nga organisasyon sa diin gintukod ini sang 1948.
Sa pagtakop naman sang ika-75 ka tuig bilang talapuanan, ginkilala man ang 75 ka mga halangdon nga mga katapu sang organisasyon.
Ang mga ini ang alagad sang pluma, nga ginabug-usan sang mga manunlat, mamalaybay, panday-pulong, manogpamulong-pulong, editor, musikero, manogwaragwag, manogpanudlo sang pulong, kag iban pa sa mga tumandok nga pulong Hiligaynon, Kinaray-a, Akeanon, Capiznon kag iban pa.
