Ginahulat na lamang sang Regional Internal Affairs Service (RIAS) VI ang tanan nga dokumento para sa patigayunon nga summary hearing proceedings sa mga police personnel nga involved sa kontrobersyal nga drug buy bust operation sang Hunyo 29 sa North Baluarte, Molo, Iloilo City.
Ang biktima amo si Karl Daniel Bolante, 27, nga amo ang naluthangan-patay sa operasyon.
Matandaan nga ginpasakaan sang kaso nga grave irregularity in the performance of duty si Police Corporal Rodante Lopez, operatiba sang Iloilo City Police Station (ICPS) 1 – Station Drug Enforcement Team kag una nga nag-ako sa pagluthang–patay kay Bolante.
Samtang mangatubang man sang kaso nga irregularity in the performance of duty based on the doctrine of command responsibility si Police Captain Shella Mae Sangrines, hepe sang ICPS 1, kag amo ang nangin supervisor sa ginpatigayon nga drug buy bust operation.
Sa interview sang Bombo Radyo kay Police Col. Calixto Mabugat, chief sang RIAS VI, iya ginpahayag nga nagapadayon pa ang imbestigasyon sa kaso ni Bolante kag ginahulat man ang resulta sang pre-charge investigation para sa summary hearing.
Dugang pa niya, makabig pa nga inosente ang mga police personnel nga na-involve sa kaso samtang wala pa napamatud-an sa korte ang ila nga violation sa natabo nga operasyon.
