ILOILO CITY – Madamu nga benepisyo ang makuha sa summer job.
Sa interview sang Bombo Radyo kay Ken Lerona, Public Relations kag Marketing Practitioner, iya ginpahayag nga madamu sang mga estudyante ang mga nagapangita sang summer job ilabi na subong nga nagtakop na ang klase.
Magluwas sa makuha nga extra income, ang summer job ang makahatag sang mga eksperyensya nga indi matun-an sa sulod sang eskwelahan.
Sa pagpili sang pagasudlan nga trabaho, mas makapaayo suno kay Lerona nga ini ang may kaangtanan man sa kurso ukon sa hilig sang aplikante.
Sa summer job suno sa natungdan, mahatagan sang kahigayunan ang aplikante nga mahanas ang iya kinaadman, mapasangkad ang intelligence quotient kag emotional quotient kag makamuklat sa ginatawag nga “real world” kun trabaho ang pagahambalan.
Magluwas diri, ang work experience suno kay Lerona ang makabulig man sa ulihi sa pagpangita sang trabaho bangud nga kalabanan sa mga employer subong ang nagalantaw sa eksperyensya sang aplikante.
Bag-o mag-apply, makabulig man suno kay Lerona ang pagtumod sang “strength” kag “weaknesses” agud nga mahibalu-an kun ano nga mga trabaho ang dapat nga sudlan sang aplikante.
Nagakadapat man nga ang mga nakasaad sa resume kag application letter amo ang mga importante nga impormasyon lamang.
Magluwas diri, dapat man nga tandaan sang mga aplikante nga mangin tampad sa pagsabat sa mga pamangkot ilabi na sa tion sang interview.
