May yara man bala ikaw sang hinuptanan nga isda sa imo nga balay?
Nakahibalo ka bala nga kaangay sa tawo, nagakasubuan man ang isda kun wala sang nagasapak sa iya kag makabatyag man sang pagpalangluya?
Amo ini ang natabo sa isa ka sunfish nga nabutang sa isa ka aquarium sa southwestern Japan.
Nag-abot ang isda sa Shimonoseki City Aquarium Kaikyokan sa Yamaguchi, Japan sang Pebrero 2024 halin sa southern coast sang Kochi sa Pacific Ocean. Sang yara na siya didto sa aquarium, nangin isa siya sa pinakabantog nga attractions sa pasilidad bangud miyembro siya sang blowfish family nga kilala sa unique shape ang iya daku nga mga mata.
Apang sang Disyembre 1, nagdesisyon ang aquarium nga masirado anay sila para sa anum ka bulan nga renovation rason nga wala anay sang ginpasulod nga mga bisita kag turista.
Didto man kag nag-umpisa nga nagluya ang isda rason nga nagsuspetsa ang aquarium keepers nga basi kun may yara ini sang digestive problems. Gingamay man ang ginhatag nga pagkaon kag ginbisitahan man nila ang fish tank para mahatagan ini sang comfort sa tion nga maggahod na ang construction — apang amo man gihapon ang sitwasyon sang isda.
Padayon ini nga nadulaan sang gana kag nagpahimuyong lang sa isa ka bahin sang fish tank kag tuman ka subo kun tulukon.
Sang ulihi, ginkonsiderar na sang facility ang suhestiyon sa isa ka staff meeting nga basi kun naapektuhan gid ang isda bangud gulpi lang nagkaladula ang mga tawo sa iya palibot.
Apisar may pagpang-duha-duha, nagdesisyon ang aquarium keepers nga tilawan abi nila nga ipakabit ang ila nga mga uniform sa palibot sang fish tank.
Nagbutang man sila sang cutouts nga daw tawo amo man ang mga laragway sang nagayuhom nga mga tawo para ma-cheer kuno ang isda.
Suno sa aquarist nga si Moe Miyazawa, nakahibalo man siya nga nagalantaw ang isda sang ginpakabit nila ang cutouts apang amo na lang ang ila kakibot nga pagkasunod nga adlaw, nagkaon na ang isda.
Ini ang labing-una nga tion sa sulod sang isa ka semana nga may gana ini sa pagkan kag nangin steady man ang pag-recover sini. Bangud sadto, nag-umpisa man ang staff sa masami nga pagbisita sa isda kag naga-wave pa sila sa sunfish.
Nagalaum ang aquarium keepers nga magabalik man ang fans agud mabisita liwat ang sunfish kun magbukas na liwat ang aquarium sa summer pagkatapos sang ila nga renovation.
