Nagdangat sa masobra P1.3 milion ang ginabanta nga balor sang halit nga nabilin sang sunog sa Barangay Rizal, Lapuz, Iloilo City kaina sang aga.
Sa latest nga rekord sang Iloilo City Fire Station, siyam ka mga balay ang totally burned kag duha ang partially burned; samtang 14 ka mga pamilya ang nalista nga apektado.
May lima man ka nalista nga injured lakip sanday Dinolo Fernandez, 55, nga nakagat sang ido; Banessa Balgos, 24, nga nabudlayan sa pagginhawa; 13 anyos nga bata nga nabudlayan man sa pagginhawa; Ilyn Gagne, 57, nakaangkon sang first-degree burn; kag Bonita Balgos, 59, nga may puncture wound sa tuo nga tiil.
Sa interview sang Bombo Radyo kay FO3 John Anthony Triveles, arson investigator, iya ginpahayag nga nakalab-ot na sa 4th alarm ang sunog nga ginapahayag naghalin sa isa ka boardinghouse.
Suno kay Triveles, madamo sang mga anggulo nga ginalantaw sa ginhalinan sang kalayo apang padayon pa subong ang imbestigasyon sang Bureau of Fire Protection.
Matandaan nga kahapon man sang hapon, ginlamon man sang kalayo ang Jalandoni Estate Lapuz, Iloilo City nga kaiping nga barangay sang Rizal kun sa diin yara sa 25 ka mga balay ang nasunog kalakip na ang balay ni Punong Barangay Efren Gimeo. ##
