Nagpanginwala si Sunshine Cruz nga ginasakit siya sang bilyonaryo nga negosyante nga iya partner nga si Atong Ang.
Sa iya latest post, ginpakita sang aktres ang screenshots sang mga post nga may “malisyoso” nga mga claim. Iya ini gintawag nga “fake news” kag halin sa kwestyonable nga mga site.
Lakip sa mga post ang nagasiling nga nagapangayo si Sunshine sang hustisya bangud ginasakit siya sang pisikal ni Atong.
Nagdugang pa si Sunshine nga indi dapat basta-basta nga mag-pati sa mga nakabutang sa internet bisan pa nga may picture kag may quote nga nakahimo-himo sa tupad sini.
Matandaan nga 2024 sang ginkumpirma ni Atong ang relasyon nila sang aktres matapos nga nakit-an sila nga naga-kiss.
Wala sang opisyal nga kumpirmasyon halin kay Sunshine apang pila ka beses sila ng nakit-an nga magkaupod.
Ka-long-term relationship anay ni Sunshine si Macky Mathay. Kasado man siya anay kay Cesar Montano, apang gin-annul ang ila kasal sang 2018.
Si Atong naman ang na-link anay kay Gretchen Barretto. Nabutang subong sa sentro sang kontrobersiya ang amo nga negosyante matapos siya ang ginatudlo sang isa sa mga akusado nga mastermind sa pagkadula sang mga manugbulang sang 2021. Gintudlo man si Gretchen nga may ihibalo sa amo nga krimen.#
