ILOILO CITY – Liwat nga magapatigayon sang sunud-sunod nga hublag protesta ang grupo ni Iloilo City Councilor Plaridel Nava upod sa pila ka mga progresibo nga grupo may kaangtanan sa palpak nga P680-million Ungka Flyover.
Sa interview sang Bombo Radyo kay Nava, iya ginpahayag nga magapadayon ang mga hublag protesta tubtob nga makalab-ot sa House of Representatives, sa Senado, kag kay Presidente Ferdinand Marcos, Jr. agud nga mapilitan ang mga mamalidha nga magpatigayon sang inquiry in aid of legislation.
Nagalaum man si Nava nga mag-gahud man ang publiko agud nga makalab-ot sa presidente nga amo ang magamandu sang imbestigasyon.
Suno kay Nava, sa adlaw mismo sang pagpasaka sang kaso batuk sa Department of Public Works and Highways- Region VI kag International Builders Corporation nga amo contractor sang P680-million Ungka Flyover, magapatigayon man sang rally sa atubang sang Office of the Ombudsman kun sa diin i-file ang reklamo.
Magluwas sa Ungka flyover, magapatigayon man sang rally sa syudad sang Iloilo depende sa lugar nga pahanugutan sang local government unit.
Samtang, nagakabalaka man si Nava bangud naggwa pa nga malain ang mga cause oriented groups bangud sa pag-upod sa condemnation rally sang Martes.
Suno kay Nava, kuntani, indi na pag-intrahan sang kun ano nga bagay ang tinutuyo sang nagkalain-lain nga grupo bangud public interest ang gina-istoryahan kag prayoridad ang pagsolbar sa problema sa flyover.
Apisar nga nalipay si Nava sa maayo nga pag-upod sang nagkalain-lain nga mga grupo sa condemnation rally, nasubu-an man ini bangud nga madamo sang mga local officials nga daw kaangay nga wala sang labot sa problema sa depektuso nga proyekto.
Nagpanawagan man si Nava sa mga local officials nga indi lang ang Department of Public Works and Highways- Region VI ang basulon kundi mangin ang contractor nga suno kay Nava, malapit sa mga ini.
