Matunog sa gihapon ang nagkalain-lain nga reaksyon sa Super Bowl comeback sang pop superstar nga si Rihanna, apang isa sa agaw-atensyon amo ang pagpanghikay nga ginahimo ni former United States President Donald Trump.
Gintawag ni Trump ang 15-minute half-time performance ni Rihanna nga “epic fail” kag “worst halftime show” sa maragtas sang amo nga sporting event.
Apisar ginkumpirma nga nagabusong sa iya Baby Number 2 si Rihanna sang tion sang iya performance, wala gihapon sang preno ang former president sa pag-insulto sa singer.
Sang Agusto 2020, gin-atake man ni Trump ang Grammy-winning singer kag nagsiling nga indi ini dapat pagtugutan sang National Football League nga mag-perform sa Super Bowl.
Wala nagsabat ang Barbadian multibillionaire musician kag business entrepreneur sang amo nga tion, apang antes pa man sini, kilala na siya nga kritiko sang former president.
Gintawag sini anay si Trump nga “the most mentally ill human being in America.” ##
