Ginalantaw sang state weather bureau nga posible nga mangin kaangay sang natabo sang 1997 tubtob 1998 ang epekto sang El Niño phenomenon nga ginapaabot nga maga-igu sa Pilipinas subong nga tuig.
Sa interview sang Bombo Radyo kay Dr. Nathaniel Servando, administrator sang Philippine Atmospheric, Geophysical and Astronomical Services Administration (PAGASA), iya ginpahayag nga sang amo nga mga tinuig, mabaskog kag malawig ang epekto sang amo nga phenomenon.
Sang amo nga tion, nagresulta ang El Niño sang tuman nga kakulang sang ulan sa nagkalain-lain nga mga rehiyon sa bilog nga kalibutan.
Sa Pilipinas, nagnubo sang katunga ang kadamuon sang ulan kag halos walo ka porsyento ang pagbuhin sa produksyon sang agrikultura.
Nakaapekto ini sa 74,000 ka ektarya sang kaumhan sa 18 ka probinsya, samtang nagnubo man sang masobra 14 porsyento ang kalaparon sang mga gintamnan sang nagapanguna nga mga pananom sang 1997.
Nagnubo man sang 24 porsyento ang produksyon sang palay kag 12 porsyento naman sa produksyon sang mais.
Suno naman sa latest projection sang PAGASA, posible nga maka-eksperyensya ang bilog nga pungsod sang dry condition, dry spell kag drought sa Nobyembre kag Disyembre subong nga tuig, samtang pagsulod sang Enero 2027, ginapaabot nga bilog na nga pungsod ang maka-eksperyensya sang drought.
Ginpatpat sang ahensya nga isa ka dry condition ang sitwasyon kun ang isa ka lugar naga-eksperyensya ukon ginapaabot nga maka-eksperyensya sang duha ka magkasunod nga bulan nga below-normal ang rainfall, ukon tubtob 60 porsyento nga pagnubo halin sa kinaandan nga kadamuon sang ulan.
Dry spell naman ang tawag kon below-normal ang kadamuon sang ulan sa sulod sang tatlo ka magkasunod nga bulan, samtang drought naman kon sobra ka nubo sa normal average ang kadamuon sang ulan, ukon may sobra sa 60 porsyento nga pagnubo halin sa kinaandan nga rainfall.#
