Nag-landfall na si Super Typhoon Yagi sa probinsya sang Hainan nga isa ka popular nga kaladtuan sang mga turista sa southern China.
Suno sa meteorological service, naglaslas si Yagi sa Wenchang City sa amo nga probinsya pasado alas kuatro sa hapon samtang dala ang kabaskugon nga 245km/h malapit sa sentro.
Antes ang landfall, nahingagaw na nga napabakwit sang gobyerno ang 419,000 ka mga tawo sa amo nga island province.
Ginkanselar man ang flights sa Hainan, Guangdong, Hong Kong kag Macau, amo man ang mga bangko kag eskwelahan.
Indi kinaandan ang pag-landfall sini sa Hainan bangud halin sang 1949 tubtub sang 2023, 106 ka mga bagyo ang nag-agi sa isla apang siyam lamang ang nagtupa sa kategorya nga super typhoon.
Ang Yagi nga kilala anay nga Bagyo Enteng sang yari pa sa Pilipinas amo ang ikaduha nga pinakabaskog nga tropical cyclone sa 2024 kasunod sa Category 5 Atlantic Hurricane Beryl nga amo naman ang naglaslas sa Pacific basin.
16 ka mga tawo ang napatay sa Pilipinas antes ini nagguwa sa Philippine Area of Responsibility sang nagligad nga Miyerkules.
Ginalantaw nga magalaslas ini pati sa Guangdong province sa China antes maghulag pakadto sa direksyon sang Beibu Gulf.
Kun basehan ang track forecast, pagkatapos sa southern China, maga-diretso ang bagyo sa Vietnam, particular sa northern kag north-central regions sa palibot mismo sang UNESCO heritage site nga Halong Bay sa weekend.#
(Photo: Guo Cheng, AP)
