ILOILO CITY – Gintumod sang bag-o nga pinuno sang compliance team sang Iloilo City Government ang mga ‘superspeader events’ sa mga barangay sa syudad kun ngaa wala gihapon naganubo ang kaso sang COVID-19 apisar masobra isa ka tuig na halin sang nag-umpisa ang pandemya.
Sa interview sang Bombo Radyo kay Nestor Canong, newly-installed compliance team head, iya ginpahayag nga may mga bunyag, kasal, kag birthday celebrations sa gihapon nga ginatipunan ang magpamilya.
Isa pa ka lugar kun sa diin madasig maglapta ang virus amo ang mga haya sa patay bangud ‘wala sang disiplina ang tawo’ suno kay Canong.
Suno pa sa natungdan, halos lima ka adlaw na nga wala naganubo sa 100 ang single-day tally sang COVID-19 sa Iloilo City bisan napaidalom na gani ini sa modified enhanced community quarantine (MECQ).
Alarming ini suno sa iya apang makit-an nga daw wala lang sa bungog sang iban nga mga pumuluyo.
Nasapol na ni Canong ang mga Association of Barangay Captains presidents agud mapalab-ot sa 180 ka mga punong barangay sa Iloilo City nga barangay level dapat ang pagdisiplina sa mga tawo kag pagpatuman sang health protocols.
Santo sa record sang Department of Health Region VI, ang syudad sang Iloilo ang may yara sang 1,489 ka active cases sang coronavirus.
