ILOILO CITY – Manabat ang immediate supervisors ni PO1 Christian Kenneth Senon nga nagluthang-patay sa kaangay nga pulis nga si PO1 Melchor Casipe Jr. sa headquarters sang 602nd Regional Mobile Force Battalion sa Barangay Guadalupe, Janiuay, Iloilo.
Suno kay Police Regional Office 6 (PRO-6) director Chief Supt. John Bulalacao, dapat nahibaluan sang mga pinuno sang nasambit nga kapulisan ang aktibidad sang ila mga tinawo.
Santu sa pagpangusisa ni Bulalacao kay PO1 Senon nga nag-atubang sa iya kahapon, naghingalit lang nga makaguwa kag mag-inom-inom ang duha ka pulis upod si PO1 Leones.
Gilayon naman nagpatigayon sang imbestigasyon ang bag-o lang nag-assume nga company commander sang 602nd Battalion sang Regional Mobile Force tuhoy sa pagluthang-patay ni PO1 Senon kay PO1 Casipe.
Suno kay Senior Insp. Charlie Sebastian, nagaguwa sa iya initial nga pagpangusisa nga naglisensiya kanday PO1 Casipe, PO1 Senon kag PO1 Jona Mark Leones nga magguwa mga alas 3:00 sang hapon sang Dominggo bangud may kinahanglan baklon.
Nag-inom-inom ang tatlo tubtob nagsabtanay ang suspek kag ang biktima kag nadala pa nila pagbalik sa kampo ang indi pag-intyindihanay.
Sa paghangop ni Senior Insp. Sebastian, nag-ugat ang suyaay sang duha sa isyu sang seniority.