ILOILO CITY- Nagpasalig ang Iloilo Provincial Government nga bastante ang suplay sang baboy sa probinsya.
Sa interview sang Bombo Radyo Iloilo kay Governor Arthur Defensor Jr, iya ginpahayag nga apisar gin-ban na ang pagsulod sa Iloilo sang baboy kag pork products gikan sa Mindanao sa diin nakumpirma ang bag-o nga mga kaso sang African Swine Fever (ASF) sa Don Marcelino kag Maita, Davao Occidental, indi sa gihapon pagkulangon ang baboy sa Iloilo.
Apang, suno kay Defensor temporaryo lang ang pag-ban sang mga pork products gikan sa Mindanao.
Matandaan nga gin-isyu ni Defensor ang Executive Order 027-A nga nagapatuman sang amo nga ban bilang dugang sa mga lugar nga nauna na nga ginban sang provincial government ang pagsulod sang swine, pork, pork products gikan sa Luzon kag mga pungsod nga positibo sa African Swine Fever kaangay sang Poland, Romania,Latvia, Russia, Belgium, Bulgaria, Moldova, Vietnam,Ukraine, Luxembourg, Cambodia, Myanmar, South Korea,Lao People’s Democratic Republic, kag China.
Samtang,wala naman napat-ud ni Governor Defensor kun masarangan sang Iloilo nga mag-suplay sang karne sang baboy sa iban nga lugar.
Suno sa gobernador, isa sa posible rason diri amo ang kakulangan sang slaughter house nga double A standard sa probinsya nga Passi City pa lamang ang nakapatukod.
Ginpahayag sang gobernador nga dulugangan gid man ang slaughter house sa Iloilo apang mahal ini gani nagasalig na lang ang probinsya sa programa sang National Meat Inspection Service.
Suno pa sa opisyal, may plano nga magpatukod sang slaughter house ang national government sa Sta. Barbara, Iloilo kag nagalaum ang gobernador nga matuman ini sa pinakamadali nga tion.
Angot naman sa gina-propose nga pag-konsumo sang kuneho bilang alternatibo sa baboy, ginpahayag sang natungdan nga bukas ini sa nasambit nga posibilidad apang indi ini mahapos bangud wala diri naanad ang pumuluyo.
