ILOILO CITY – Wala sang nagakadapat nga kakulbaan ukon kabalak-an ang mga pumuluyo sa Western Visayas bangud ginpasalig sang Bureau of Animal Industry Region 6 nga may yara sang bastante nga suplay sang baboy sa rehiyon.
Sa interview sang Bombo Radyo kay Dr. John Roel Hilario, Regional Veterinary Quarantine Office VI sang Bureau of Animal Industry Region 6, iya ginpahayag nga naka alerto kag naka standby ang nasambit nga ahensya sa mga nagkalain-lain nga produkto ukon karne sang baboy nga nagaguwa-sulod sa Western Visayas.
Suno kay Hilario, indi lang ang Bureau of Animal Industry ang nagabantay sa mga paluparan kag pantalan kundi may yara man sang nagkalain-lain nga ahensya nga nagabulig sa pagtukib sang mga karne sang baboy agud mahibaluan kun may yara sang positibo sa African Swine Fever sa produkto.
Pahayag niya, masobra 200% ang supply sang baboy sa Western Visayas.
Sa bahin naman sang mga frozen food suno sa natungdan, ang may yara sang hurisdiksyon amo ang Food and Drug Administration, Local Government Unit kag National Meat Inspection Service.
May yara man sang ginapatigayon nga surveillance ang Bureau of Animal Industry sa mga dalagko nga mall agud nga masekyar nga safe ang mga frozen food.
Tagsa ka mga ahensya ang may yara man sang protocol pahayag niya agud nga siguraduhon nga hilway ang karne sang baboy sa African Swine Fever.
Nagabulig man ang mga local government unit sa pagtsekyar sang mga dala sang pasahero sa mga domestic kag international flights sa diin gina-kumpiska kag may yara sang reshipments nga ginahimo kun may dala nga karne sang baboy ang pasahero nagikan sa mga lugar nga may kaso sang ASF.
Sa subong, hugot nga gina engganyo ni Hilario ang mga pumuluyo nga mag bakal sang karne sang baboy sa lokal agud nga masiguro nga hilway ini sa nasambit nga balatian.
