LAGUNA – Wala na halos sang mabaklan sang face masks sa mga commercial establishments sa Calamba, Laguna bangud sa pagtaas sang demand kasunod sang paglupok sang Taal Volcano sa Batangas.
Sa interview sang Bombo Radyo kay Kenneth Alf Fatagani, tumandok sang Miag-ao, Iloilo apang apat na ka tuig nga nagatinir sa Brgy. Makiling, Calamba, Laguna, iya ginpahayag nga naubusan na sang mga stock ang mga business centers sang Dominggo pa lang sang gab-i.
Pino nga yab-ok ang nagatupa suno kay Fatagani, kag ang baho sini ang daw kaangay sa asupre.
Sang Domingo suno kay Fatagani, halin siya sa Manila kag ‘las otso na sa gab-i kag nakaabot sa Laguna.
Suno kay Fatagani, wala na siya sang makit-an bisan bituon kag mga pagpangilat na lang sa naibabaw nga bahin sang Taal Volcano ang iya makit-an, magluwas pa sa mabatian nga pagpanaguob.
Sa subong, wala man sa gihapon ginarekomenda ang pag-guwa sa kabalayan ilabi na kun wala sang panaming kaangay sang face mask, payong, panyo, ukon kalo, bangud suno kay Fatagani, daw kaangay sa pulbos ang kaputi sang abo nga nagatupa sa panit.
Bisan sa sulod sang balay, nagatupa man ang abo kun wala sang kisame.
Bangud sa kakulang sang suplay sang face mask, nagamato mato na lang ang mga tawo suno sa natungdan kag kalabanan sa ila ang nagagamit na lang sang bayo ukon panyo agud matabon sa ilong.
Ginahulat man sang tanan ang mga mandu sang local government units kaangot sa pagbalik sang trabaho sa lugar.
