ILOILO CITY – Naggamay na ang suplay sang iligal nga droga sa syudad sang Iloilo bangud sang mabaskog nga kampanya sang kapulisan.
Sa interview sang Bombo Radyo kay Police Colonel Joeresty Coronica, direktor sang Iloilo City Police Office, iya ginpahayag nga nagnubo naman ang numero sang mga durugista sa syudad bangud nga ang iban sa ila ang nagsaylo na.
Suno pa kay Coronica, may mga madakpan sa gihapon apang indi tuman ka damo kun ikumpara sa nagliligad nga mga binulan.
Sa Barangay Bakhaw, Mandurriao nga una nga ginkilala nga drug hotspot sa syudad, base sa monitoring sang kapulisan, amat-amat na nga naga-lie low ang mga durugista.
Apisar sini, ginpahayag ni Coronica nga wala sila sa gihapon nagakumpyansa bangud mahimo nga magbalik ang mga durugista sa tion nga pabay-an lamang.
Gin-ako man ni Coronica nga may yara sa gihapon sang mga drug dens sa syudad apang nagpasalig ini nga sa tion nga may mabaton sila nga impormasyon, gilayon nila ini nga gina-aktuhan.
Gin-athag man sang director nga ang tanan nga operasyon sang kapulisan sa syudad ang intelligence driven kag wala ginapalagpatan lang.
Nagpaandam man ini sa mga nabilin nga durugista nga mag-untat na bangud padayon ang paglagas sang kapulisan.
Dugang pa niya, ang mga may malain nga ginahimo ang wala nagamadinalag-on sa katapusan.
