‘May problema na sa suplay sang baboy sang Pilipinas, kag kuntani, indi na diri magdugang ang problema sa kakulangan sa suplay sang isda.’
Ini ang pahayag ni Senator Francis Pangilinan bangud sa ginapanan-aw nga posibilidad sang kakulangan sang suplay sang isda sa tunga sang kontrobersyal nga pagtinir sang ginatos ka Chinese vessels sa traditional Filipino fishing grounds sa West Philippine Sea.
Suno kay Pangilinan, indi man kuntani ini pagpahanugutan nga matabo bangud mabudlay kun magmahal ang pagkaon: ‘Indi lang heart-broken ang tawo kundi ginasakitan pa sang tiyan’.
Si Pangilinan ang kabahin sang proponents sang ginaduso nga Department of Fisheries and Aquatic Resources.
Kasunod sini, nagpanawagan si Pangilinan sa gobyerno nga mag-akto gilayon sa mga pagpamahog sa teritoryo sang Pilipinas kag sa posible nga epekto sini sa ginakaon sang mga Pinoy.
Nagpanawagan man si Pangilinan sa Bureau of Fisheries and Aquatic Resources nga maghatag sang assistance sa mga apektado nga mga Pinoy nga manugpangisda.
