Nagpaandam ang Bureau of Fisheries and Aquatic Resources (BFAR) nga posible maapektuhan ang suplay sang isda sa pungsod sa pagsugod sang El Niño.
Suno sa ahensya, posible nga magtuga sang fish kill ang tuman ka init nga tyempo.
Ginpahayag pa ni BFAR chief information officer Nazzer Briguera nga katunga sang fish production sa pungsod ang nagikan sa aquaculture kaangay sang tilapia kag bangrus.
Suno kay Briguera, maganubo ang lebel sang tubig, buot silingon, maganubo man ang dissolved oxygen kag magaresulta sa kamatayon sang mga isda kun indi mahimuan gilayon sang mitigating measures.
Sang 2019, matandaan nga nagdangat sa 20% ang kapyerdehan sang produksyon sa isda bangud sa tuman ka init nga tyempo.
Bisan may negatibo nga epekto ang init, ginpahayag nga benepisyo naman ini para sa pelagic species kaangay sang tuna, sardines, kag tamudyos bangud nagasaka ang produksyon sini kun mataas ang sea temperature.
