Naganubo na ang suplay sang liquid oxygen sa Cebu kun sa diin nagahalin ang ginabakal sang Iloilo City nga oxygen tanks.
Sa interview sang Bombo Radyo kay Iloilo City Mayor Jerry Treรฑas, iya ginpahayag nga nakapakig-angot sa iya si Mr. Fulbert Woo, ang supplier sang oxygen tanks sa mga ospital sa Western Visayas.
Suno kay Treรฑas, ginpalab-ot ni Woo nga bangud sa pagtimbuok sang kaso sang COVID-19 sa Cebu, nagnubo man ang suplay sang importante nga ingredient sang mga oxygen tank.
Apisar sini suno sa alkalde, nagpasalig si Woo nga tinguhaan sini nga makakuha sang suplay sang liquid oxygen gikan sa Luzon.
Gin-ako naman ni Treรฑas nga ”urgent” ang pagkinahanglan sang syudad sang dugang nga oxygen tanks bangud wala untat ang pagsaka sang kaso sang virus.
Bangud sini pahayag sang alkalde, mahimo nga gamiton anay bilang modular field hospital ang duha ka quarantine facility sa Sooc, Arevalo, Iloilo City nga may 32 ka quarantine beds.
Plano man sang syudad nga mag-hire sang dugang nga 30 ka nurses kag 30 man ka nursing aide nga iga-deploy sa vaccination sites agud mapasangkad ang pagpabakuna sa pumuluyo batok sa COVID-19 agud man nga mapahagan-hagan ang kaso sang virus.
