Ginpasiguro sang Department of Agriculture nga bastante ang suplay sang sibuyas sa pungsod apisar nga nagapanglalapaw na ang presyo sini sa pila ka mga merkado.
Suno kay Agriculture spokesperson Asec. Kristine Evangelista, “food mobilization” ang isyu subong rason nga mataas ang presyo sang sibuyas ilabi na sa mga balaligyaan sa Metro Manila.
Kun lantawon ang imbentaryo sang sibuyas sa Pilipinas, ginalauman nga bastante man ang suplay sini para sa kinahanglanon subong nga holiday season.
Ini bangud suno kay Evangelista, may bag-o man nga ani sang mga sibuyas sa ikaduha nga semana sang Disyembre.
Ginabanta nga may yara subong sang 13,000 metric tons sang red onions kag ginalauman nga makaharvest ang local farmers sang 5,000 metriko tonelada nga pula nga sibuyas subong nga bulan.
Padayon man nga ginatun-an sang ahensya kun kinahanglan pa nga mag-import sang dugang sa sini nga produkto.
