ILOILO CITY – Tuman ka apektado ang pila ka mga residente sang Barangay North Baluarte, Molo, Iloilo City bangud sa kakulang sang supply sang tubig nga resulta sang maintenance activites sang Metro Pacific Iloilo Water.
Ini matapos nga kinahanglan pa sang mga ini nga magbakal sang tubig ukon magsag-ob.
Sa interview sang Bombo Radyo kay Ruselyn Labao, housewife, kag residente sang amo nga barangay, iya ginpahayag nga nabudlayan gid ini bangud wala ini sang ikasarang sa pagpabutang sang koneksyon sang Metro Pacific Iloilo Water, sa baylo, nagakuha na lamang ini sang tubig sa kaiping nga mga balay.
Suno kay Labao, mas mabudlay pa gid ang sitwasyon kun wala sang tubig kag kwarta bangud limitado lang ang giho sini.
Samtang, ginpakigbahin naman ni Punong Barangay Allan Aurelio sang North Baluarte, Molo nga 60% na sang mga pumuluyo ang may yara sang koneksyon sang tubig, samtang ang nabilin nga 40% ang wala pa bangud wala ang ini sang ikasarang nga magpatakod.
Suno kay Aurelio, sa bahin sang mga residente nga wala sang koneksyon sang tubig, nagakuha na lamang ang mga ini sa mga bubon nga water stations.
Nahiibaluan nga una na nga ginpahayag sang Metro Pacific Iloilo Water nga magapatigayon ini sang water service interruption sa pila ka mga lugar sa Iloilo CIty bangud sa pag-repair sang mga leakages sa water network system sa area.
