Nagnubo sa 54.09 million liters kada adlaw ang suplay sang tubig sang Metro Pacific Iloilo Water (MPIW) sang 2024, mas manubo kumpara sa normal nga average nga 80.95 million liters kada adlaw.
Bangud sini, ginapreparahan na sang MPIW kag Iloilo City Government ang mga tikang agud maatubang ang posible nga epekto sang ginapaabot nga strong to very strong El Niño sa suplay sang tubig sa siyudad.
Nahibaloan nga nakigsapol si Mayor Raisa Treñas sa MPIW agud istoryahan ang ila El Niño Mitigation Plan, nga nagalakip sang pagdugang sang suplay, paggamit sang modular water treatment units kag pagkayo sang mga leak sa tubo agud maminusan ang non-revenue water.
Samtang, target sang MPIW nga makadugang sang 25 million liters per day nga suplay sang tubig agud mapun-an ang posible nga pagnubo sang produksyon.
Ginalantaw man ang pag-adjust sang iskedyul sang distribusyon suno sa aktuwal nga produksyon kag pagdugang sang water tankers sa mga lugar nga posible maapektuhan sang kakulangan.
Sa tion sang pakigsapol, wala pa matumod ang aktuwal nga epekto sang El Niño sa suplay sang tubig bangud magadepende ini sa kalawigon sang tig-ilinit kag sa aktuwal nga kadamuon sang pag-ulan suno sa MPIW.
Text by: Bombo Cyrene A. Nasis
