ILOILO CITY – Indi masigurado ni Iloilo City Mayor Jerry Treñas kun bala may mabakal pa nga testing kits gikan sa South Korea agud kun tani magamit diri sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga ang supplier nga ginbaklan sang private sector agud nga idonar sa syudad sang Iloilo amo man ang ginbaklan sang Estados Unidos.
Suno kay Treñas, mas nauna sa pagbakal sang 500,000 ka bilog nga testing kits ang Estados Unidos bangud sa maid-id nga requirements sang Department of Health.
Ginpahayag ni Treñas nga sa subong, indi niya makumpirma kun may mabilin pa nga testing kits ilabi pa nga madamo man nga pungsod ang nagabakal sini.
Sa pihak sini, ginpasalig naman sang alkalde nga may dugang nga Personal Protective Equipment nga maga-abot sa masunod nga mga inadlaw kag ini ang igapanghatag sa mga medical personnel sa syudad sang Iloilo.
May kaangtanan sa ginapatuman nga Enhanced Community Quarantine, ginpahayag sang alkalde nga ang Iloilo City Community College ang magaserbe nga temporary shelter sang medical personnel samtang ang Iloilo Central School naman ang magaserbe nga isolation facility sa mga Persons Under Monitoring kag Persons Under Investigation.
Kadungan sini, gin-athag sang natungdan nga ang home quarantine pass ang libre nga ihatag sa tagsa ka pamilya kag dapat nga house-to-house ang pagpanghatag sini kasubong sang food assistance.
