ILOILO CITY – Yara sa critical level ang supply sang dugo sa Philippine Red Cross-Iloilo ilabi na subong nga may pandemic.
Sa interview sang Bombo Radyo kay Dr. Dennise Roy Pasadilla, West Visayas Regional Blood Center kag Director sang Philippine Red Cross-Iloilo, iya ginpahayag nga tuman ka gamay ang nagadonar sang dugo ilabi pa subong nga ginpalawig ang Enhanced Community Quarantine.
Suno kay Pasadilla, ang makuha nga dugo gikan sa 15 tubtub 20 ka successful blood donors ang daku na nga bulig agud nga madugangan ang supply sa Philippine Red Cross.
Ginpahayag ni Pasadilla nga lakip sa mga rason kun nga-a yara sa critical level ang supply sang dugo amo nga wala sang may masakyan ang mga blood donor kag ginpauntat ang pagpatigayon sang blood donation activity sa bug-os nga pungsod.
Kun tani suno sa natungdan, ang mga Local Government Unit nga wala na sang Persons Under Investigation kag Persons Under Monitoring ang mahimo na nga makapatigayon sang blood donation.
Ang mga sucessful blood donors naman ang pagahatagan sang Philippine Red Cross sang food packs bilang token.
Sa subong, ginahulat pa sang Philippine Red Cross-Iloilo ang guidelines gikan sa national headquarters agud nga makapatigayon naman sang plasma donation nga labing kinahanglan sang mga Coronavirus Disease (COVID-19) patients.
