MANAMA, BAHRAIN – Ginakulang na ang supply sang facemask kag sang alcohol sa Bahrain may kaangtanan sa Coronavirus Disease 2019 (COVID-19).
Sa interview sang Bombo Radyo kay Lester Sabijon, chef sa Manama, Bahrain, iya ginpahayag nga sa pinakaulihi nga data, 33 na ang kumpirmado nga kaso sang COVID-19 sa nasambit nga pungsod.
Suno kay Sabijon, isa ka ewskwelahan ang ginpasirado sa sulod sang 14 ka adlaw matapos nga nagpositibo sa virus ang school bus driver.
Ginpahayag ni Sabijon nga naghina ang negosyo sa Bahrain bangud nga kalabanan ang nagalikaw na nga magguwa sa ila balay agud nga indi malatnan sang virus.
Sa pagkamatuod suno sa Ilonggo Chef, may 2 tubtub 3 na ka mga pharmacy sa nasambit nga pungsod nga ginpasirado bangud sa tuman ka daku nga patong sa ginabaligya nga facemask.
