ILOILO CITY – Ginakulang ang supply sang platelet ilabi na subong nga nagtaas ang kaso sang Dengue.
Sa interview sang Bombo Radyo kay Kim Bryan Diez, donor recruitment officer sang Philippine Red Cross-Iloilo, iya ginpahayag nga magluwas sa dugo, ginakulang man ang supply sang platelet concetrate ukon mas kilala sa tawag nga puti nga dugo.
Ginpahayag ni Diez nga ang dugo ang kinahanglan nga magamit sa sulod sang 35 ka adlaw samtang ang platelet naman ang kinahanglan nga magamit sa sulod sang lima ka adlaw.
Sa pagpaathag ni Diez, ang platelet ang lubos nga ginakinahanglan para sa pagtapna sang pagdugo sa mga tawo nga may yara sang low platelet count ukon poor platelet function ilabi na ang mga may yara sang Dengue.
Ang pagkuha sang dugo sa Philippine Red Cross suno kay Diez ang libre apang may yara lang sang ginabayaran nga processing fee.
Lakip sa mga qualifications sa pagdonar sang dugo amo nga dapat naga-edad sang 16 tubtub 60 anyos, parent’s consent para sa mga menor de edad, nagabug-at sang 50 kilo pataas, wala sang balati-an samtang ginadumili-an naman ang mga nagabusong nga magdonar sang dugo.
