ILOILO CITY – Wala sang ginhimo nga nagakaigo nga koordinasyon ang Metro Pacific Iloilo Water sa ila mga bulk water suppliers agud mangin tayuyon ang serbisyo sa publiko.
Nahibaluan nga kinahanglan nga malab-ot sang Metro Pacific Iloilo Water ang minimum requirement kada adlaw nga 80 million liter, apang yara na lamang ini sa 71 million litter kada adlaw.
Sa interview sang Bombo Radyo kay Engineer Rothel John Chavez, Water Network Department Head sang nasambit nga water distribution utility, iya ginpahayag nga bangud sa lapnagon nga kakulang sa supply sang tubig, ginpakamaayo sang kompaniya nga maghimo sang supply scheduling agud mahatagan sang igtalupangod ang tanan nga mga customer.
Sa matuod suno kay Eng Chavez, nagapreparar sa gihapon ang Metro Pacific Iloilo Water sa ginapaabot nga El Niño phenomenon.
Nalakip naman sa contingency plan sang Metro Pacific Iloilo Water sa pag-supply sang tubig sa paghanda sa climatological phenomena amo ang bag-o nga mga drilling projects, dredging activities sa Tigum River, preventive maintenance para sa mga shallow wells, pag-purchase sang stand by spare pumps kag motors pananglitan may yara sang emerhensya, pag-reactivate sang deep well, pumping station nga wala na gingamit, kag pagpasiguro sang stand by backup generator set.
Nahibaluan nga ang isa sa mga bulk water supplier kaangay sang flowater resources iloilo incorporated ang makasarang nga magsupply sang tubig sa iloilo apang ginalantaw nga ang problema amo ang Metro Pacific Iloilo Water bangud sa ila magagmay nga mga tubo.
