ILOILO – Tatlo ka mga tinaga ang ginbilin sang ilonggo nga si Supreme Court Associate Justice Francis Jardeleza sa mga elected officials sa probinsya sang Iloilo.
Sa iya nangin mensahe kadungan sang oath-taking ceremony sa Iloilo Provincial Capitol subong nga adlaw, Hunyo 28, ginpahayag ni Jadeleza nga madamu siya sang may nakuha nga leksyon sa nangin homily ukon sermon ni Jaro Archbishop Emeritus Angel Lagdameo nga mahimo man maangot sa personal nga kabuhi sang isa ka public servant.
Ginpahayag ni Jardeleza nga nagakadapat nga indi gid pagkalimtan sang mga pulitiko ang Ginuo, pamilya kag pungsod.
Bilang isa kahukom, ginpahayag sang natungdan nga indi man niya madiktahan ang mga pulitiko sa patag sang panghimanwa.
Kun tani suno kay Jardeleza, dapat nga magpangamuyo ang mga pulitiko sa tanan nga tion agud nga ubayan sang Ginuo sa ila pagahimuon nga desisyon.
Kasubong man sa iya trabaho suno kay Jardeleza, iya anay nga ginapangamuyuan bag-o maghatag sang desisyon.
Magluwas sa Ginuo, nagakadapat man nga dumdumon sang mga pulitiko ang ila pamilya kag ang pungsod nga amo ang pinakamayor nga rason sang ila pag-intra sa pulitika.
