Mas maayo nga surgical lockdown sa baylo nga total lockdown ang ipatuman sa mga barangay sa syudad sang Iloilo nga nakarecord sang coronavirus disease 2019 (COVID-19) cases.
Sa interview sang Bombo Radyo kay Dr. Philip Ian Padilla, chair sang Division of Biological Sciences sang College of Arts and Sciences sa University of the Philippines – Visayas, iya ginpahayag nga mangin paralisado ang ekonomiya sang syudad kun total lockdown ang ipatuman.
Mangin apektado man ang hulag sang transportasyon kag ang trabaho sang mga tawo.
Importante man nga ipahangop sa gihapon sa mga tawo ang pagsuksok sang face mask, paghugas sang kamot, pagsunod sa physical distancing kag pagpabilin sa balay.
Indi malikawan suno sa natungdan nga mag-ginuwa ang mga tawo kun wala sila sang kalan-on sa sulod sang balay.
Gani subong nga may COVID-19 pandemic, magluwas sa pagpatuman sang lockdown, dapat suno kay Padilla nga pasangkaron pa sang gobyerno ang bulig sa mga tawo kaangay sa pag-relocate sa mga informal settlers, kag paghatag sang trabaho, ayuda kag Personal Protective Equipment (PPE).
Tuman ka dikit-dikit ang mga pamalay sa Iloilo City kag mataas ang populasyon rason nga nagataas man ang COVID-19 cases apang nagapati ang natungdan nga manageable pa ang kaso sa syudad.
Una na gin-athag sang Iloilo City Government nga nagapabilin sa Modified Enhanced Community Quarantine (MECQ) ang syudad sang Iloilo subong nga semana.
