ILOILO CITY – Indi makabulig ang mga surgical mask nga ginasuksok sang tawo sa pagpugong sang 2019 Novel Coronavirus.
Sa interview sang Bombo Radyo kay anay Departmet of Health Secretary kag subong Iloilo 1st District Rep. Janette Garin, iya ginpahayag nga mas maayo nga maggamit sang N95 mask kag indi ang surgical mask.
Apang ang N95 mask ang mahimo lamang magamit kun yara ang tawo sa isa ka epidemic area ukon sa ospital nga nagaasikaso sang pasyente nga may simtomas sang Coronavirus.
May mga bes suno kay Garin ang mga mask nga ginagamit ang makadugang pa sang impeksyon kag madasig nga tiniran sang virus bangud masami nga ginakptan ang ilong, baba kag mata bangud sa mahigko nga kamot.
Ang epktibo nga pamaagi agud malikawan ang virus amo nga hugasan ang kamot sang matinlo nga tubig kag habon, kun magpangatsi mas maayo nga ituon ang siko sa baba bangud ang siko ang indi man magamit sa pagkapot sang mga pagkabutang kag indi man maglaton sa iban ang virus.
Kinahanglan man nga i-dispose sang maayo ang tissue nga gingamit ilabi na kun ikaw ang naga ubo ukon gina sip-on kag lutuon gid sang maayo ang pagkaon.
Pahayag niya, sa mga tawo nga may mahina ang resistensya ilabi na ang may mga balatian nga diabetes, ginapaidalom sa chemotherapy ukon gina-dialysis ,mas maayo nga likawan ang mga lugar nga madamo sang tawo.
Gin-athag man sang natungdan nga ang airborne amo ang dala sang hangin nga balatian kaangay sang tigdas nga makalalaton samtang ang direct contact naman amo ang pagsulod sang virus sa lawas sang tawo kaangay sang laway sa diin pinaagi sa baba kag mata, mahimo ini nga makalaton sa isa pa ka tawo.
