Hugot nga nagapanindugan si Iloilo City Mayor Jerry Treñas nga dapat pinahan kag hatagan sang leksyon ang mga empleyado sang city government nga madakpan nga nagagamit sang iligal nga droga.
Ini kasunod man sang pagka-aresto sang isa ka job hire kag city hall employee kahapon nga adlaw bangud sa iligal nga droga.
Sa interview sang Bombo Radyo kay Mayor Treñas, iya ginpahayag nga regular man ukon job hire, tubtob nga mapatud-an nga nagagamit sang iligal nga droga, kinahanglan nga istriktohan kag pasakaan sang legal nga penalidad.
Suno kay Treñas, ang nadakpan kahapon nga driver sang LGBTQ Affairs ang gipa-cancel na ang iya nga kontrata.
Ginpahayag man sini nga naghatag na siya sang mga instructions sa iya nasakopan nga magapatuman na sang surprise drug test sa tanan nga empleyado sang city hall.
Gin-athag man sang natungdan nga may yara sang mga naga-renew sang mga contract kon sa diin indi na matumod ang mga ginahimo matapos nga maaprubahan ang renewal rason man nga ginaduso sini ang surprise drug testing.
