ILOILO CITY – Wala pa sang layi sa Pilipinas nga nagapahanugot sang surrogacy agud nga maka-angkon sang anak ang mga baw-as nga mag-asawa.
Sa pagpaathag sang Law expert nga si Atty. Charl Stuyver Moleño, ang surrogacy ang isa ka kasugtanan kun sa diin nagapahanugot ang surrogate mom nga gamiton ang iya matres sa pagdala sang fertilized eggs sang intended parents.
Suno kay Atty. Moleño, may yara sang duha ka sahi sang surrogacy nga ginalakipan sang altruistic ukon wala nagapabayad ang surrogate mom kag commercial kun sa diin may yara na sang kwarta nga involved.
Pila lamang sa mga pungsod nga nagapahanugot sang altruistic surrogacy amo ang Australia kag Canada samtang ang commercial surrogacy naman ang ginapahanugutan sa Greece, Iran kag Russia.
Sa bahin sang Pilipinas suno kay Atty. Moleño, wala sang layi nga nagahatag sang pahanugot sa surrogacy kag ang best option lamang para sa mga baw-as nga mag-asawa amo ang adoption.
Apisar sini, indi man mahinago suno kay Atty. Moleño nga nagakatabo man sa gihapon ang surrogacy sa Pilipinas apang patago lamang.
Kun basehan ang Family Code, ang surrogate mom amo ang maga-kustodiya sa bata nga naga-edad sang pito ka tuig panubo magluwas lang kun ang birth mother ang mapamatud-an sang korte nga indi makasarang sa pagsagod.
Para sa mga mag-asawa nga makasarang sa pagbayad sa surrogate mom, mas ginapili nila nga magpadulong sa mga pungsod nga nagapahanugot sang surrogacy agud nga mangin legal ang proseso sa pag-angkon sang anak.
Sa Pilipinas, pila lamang sa mga kilala nga personalidad nga nag-avail sang surrogacy agud nga maka-angkon sang anak amo ang fragrance manufacturer nga si Joel Cruz, celebrity doktor nga sanday Vicky Bello kag Hayden Kho kag ang mag-asawa nga sanday Korina Sanchez kag Mar Roxas.
