GUIMARAS – Lab-as sa gihapon sa kaisipan sang isa ka survivor ang nagkalatabo kadungan sang Iloilo Strait tragedy.
Sa interview sang Bombo Radyo kay Charie Edang sang Brgy. Igdarapdap, Nueva Valencia, Guimaras kag isa ka manunudlo, iya ginpahayag nga tubtub subong, indi pa siya handa nga magsakay liwat sa pumpboat bangud sa trauma nga gindulot sang trahedya.
Suno kay Edang, halin siya sa syudad sang Iloilo agud nga magbakal sang bulong sang iya pito ka bulan nga lapsag sang adlaw nga natabo ang insidente.
Ginpahayag ni Edang nga naatrasar pa ang pagbiyahe sang iya ginsakyan nga MB Chi-Chi bangud sa pugada tuga sang malain nga tiyempo.
Sang nagalayag na sila, tuman ka baskog sang balod kag mamadlos ang hangin rason nga mansig suksuk na lang sila sang life jacket.
Tuman ka hinali ang mga hitabo suno kay Edang kag iya na lang nga namulalungan nga nagkulob na ang pumpboat.
Sang amo nga tion, iya na lang nga ginpaminsar kun paano makaluwas para sa iya lapsag.
Agud nga makaguwa sa nagkulob nga pumpboat, iya nga gin-uba ang ginasuksuk nga life jacket agud nga makasalum kag makaguwa.
Sang nakabutwa siya suno sa natungdan, nakita niya ang iban nga mga pasahero nga nakaluwas kag gilayon sila nga nagsakay sa nagkulob nga pumpboat tubtub nga nag-abot ang rescue.
Ginabanta nga nagalab-ot sa tunga sa oras bag-o nag-abot ang mga pumpboat crew kag operators nga amo ang una nga nagpatigayon sang rescue operation.
Isa ka semana ang nakaligad, ginpahayag sang manunudlo nga indi sa gihapon niya malipatan ang nasambit nga hitabo sa iya kabuhi.
Sa pihak sang makahalanusbo nga hitabo, ginpahayag ni Edang nga kinahanglan niya nga magpakabakod
