ILOILO CITY – Indi solusyon ang pag-utas sang kabuhi sa tion nga may yara sang ginapangatubang nga problema.
Ini ang natun-an sang isa ka survivor sang attempted rape kag luyag niya nga makahatag sang inspirasyon sa mga kasubong niya nangin biktima sang pagpang-abuso.
Sa interview sang Bombo Radyo sa biktima nga nagpahinago lang sang pangalan nga Survivor, iya ginpahayag nga daku ang nabulig sang iya pamilya agud nga malampuwasan ang depression.
Suno kay Survivor, indi man lang liwan sa iya ang lalaki nga nagtuyo sa paghimo sa iya sang malain.
Natabo ang pagpangbastos suno kay Survivor sa iya mismo ginatarabhuan sa diin duha lang sila sang suspek ang nabilin.
Matapos ang insidente suno kay Survivor, indi niya mahibalu-an kun ano ang himuon kag iya na lang naisipan ang paghikog.
Paagi sa suporta sang iya pamilya, ginpahayag sang natungdan nga amat-amat niya nga nalampuwasan ang depression.
Sa subong, padayon ang legal battle suno kay Survivor apang nakaguwa sa presohan ang suspek matapos nakapyansa kag bangud man sa bulig sang mga maimpluwensya nga tawo sa komunidad.
Sa pihak sini, ginpahayag ni Survivor nga nagapabilin siya nga mabakod para sa iya pamilya kag para man sa mga kasubong niya nga survivor sang pagpang-abuso.
