ILOILO CITY- Ginsaysay sang isa ka manugtahong kon paano ini nakaluwas matapos ang kapin 24 oras nga pagpautaw-utaw niya sa kalalawran nga napatung-an sang Guimaras kag Negros.
Sa interview sang Bombo Radyo kay Rudy June Patriarca,residente sang San Enrique,San Lorenzo, Guimaras, iya ginpahayag nga nagadalagan ang iya motorbanca sang nagtindog ini apang bangud nadulaan sang balanse, nahulog ini kag nabayaan sang iya motorbanca.
Suno kay Patriarca, may nakita ini nga styrofoam nga amo ang gin-uyatan samtang ginatinguhaan nga makalangoy pahigad apang bangod dalagko ang balod, ginbudlayan ini.
Pahayag niya, samtang nagautaw-utaw sa tunga sang lawod, gin-uba niya ang iya bayo agud indi siya mabudlayan sa paghulag.
Suno pa sa iya, wala gid niya ginpanumdom nga mapatay siya kag determinado siya nga makasalbar.
Pasado alas-sais na kaina sang nakit-an siya sang mga manugpangisda kag natigayon siya nga ma-rescue.
Dako naman ang iya pagpasalamat bangud wala siya ginpabay-an sang Diyos kag buhi pa nga nakapauli sa iya pamilya.
