GUIMARAS – Indi malipatan sang isa ka iloy ang masakit nga inagihan sang bug-os niya nga pamilya sa paglugdang sang pumpboat nga MV Tawash sang 2015.
Sa interview sang Bombo Radyo kay Riza Sadaba sang Brgy. Alaguisoc, Jordan, Guimaras, iya ginpahayag nga tubtub subong, nagapabilin pa sa gihapon sa iya paminsaron ang natabo nga trahedya.
Ginpahayag ni Sadaba nga halin sila sa syudad sang Iloilo kag nagapapa-uli sang natabo ang insidente sa diin kaupod niya ang iya bana kag duha ka kabataan.
Santo sa panaysayon ni Sadaba, maayo pa ang tiyempo sang naghalin sila sa syudad sang Iloilo apang pag-abot sa tunga sang kalalawran, hinali lang nga nagdulom ang kalangitan kag nagtuhaw ang pugada.
Sang amo nga tion suno kay Sadaba, ang tanan nga nga pasahero sang pumpboat ang mansig suksuk sang life jacket tubtub nagkulob ang pumpboat bangud sa dalagku nga balod.
Sang amo nga tion, ginpahayag sang natungdan nga siya lamang sa ila pamilya ang indi makahibalo maglangoy.
Gintuad ni Sadaba nga iya na lang nga gintugyan sa Ginuo ang tanan tubtub nga naluwas siya paagi man sa iya pagpanikasog kag sa bulig sang iya bana.
Naglab-ot pa sa masobra sa 20 ka minutos bag-o sila naluwas samtang nagasakay sa nagkulob nga pumpboat.
Matapos ang natabo nga trahedya, ginpahayag ni Sadaba nga iya nabinag-binag nga tuman ka lip-ot sang kabuhi kag dapat nga magpasalamat sa Ginuo sa tagsa ka adlaw.
Matandaan nga indi magnubo sa pito ang patay matapos nga nagkapan ang nasambit nga pumpboat.
