Ginpakigbahin sang isa ka survivor sang Ninoy Aquino International Airport (NAIA) Boeing 737-300 explosion sang Mayo 11, 1990 ang istorya sini sang paglaum kag milagro bangud sa iya hugot nga pagtuo.
Ini amo si Erlinda Arellano Guarin, 73-anyos sang San Roque, Jaro, Iloilo City, nanay sang isa ka pari kag masobra tatlo na ka dekada nga nagaserbe sa Jaro Cathedral.
Sa interview sang Bombo Radyo kay Guarin, iya ginpahayag nga sa amo nga hitabo na-delay ang ila flight bangud nabilin ang isa ka madre rason nga ginhulat ini,.
Suno pa sa iya nga kun sa insakto nga oras nag-take off ang eroplano posible nga naglupok ini sa kahawaan.
Sang tion nga ato, hugot ini nga nagpangamuyo kun sa diin dala man sini ang imahe ni La Virgen de la Medalla Milagrosa.
Dugang pa sini nga nakalumpat ini sa pakpak sang eroplano rason nga nakaluwas sa amo nga insidente.
Ginakabig sini ang pagtilaw sa iya kabuhi bilang krus nga natalampuwasan sini paagi sa hugot nga pagtuo kun sa diin siya ang pinakaulihi nga tawo ang naka-survive sa amo nga hitabo.
Suno pa sa iya nga wala nagakulang ang Diyos sa paghatag sang kinahanglanon sang tawo sa kabuhi nga ini kag kun may ara sang dako nga pagtuo sa Ginoo, wala sang gid sang imposible.
Dugang pa sini nga ginhatagan gid ini sang milagro sang Diyos kag may ara pa ini sang misyon sa pagbulig sa iban nga tawo.
