ILOILO CITY- Natalana na nga magsungka ang isa sa mga suspects sa Claire Diergos Murder Case.
Ini amo si Raffy Sorioso nga isa sa tatlo nga gin-indict sa ginpatigayon nga preliminary investigation sang Iloilo Provincial Prosecutor’s Office matapos nakitaan sang probable cause nga pasakaan sang kaso nga murder.
Sa interview sang Bombo Radyo kay Atty. Dwight Trasadas, nagatindog nga legal counsel ni Sorioso, iya ginpahayag nga plano ni Sorioso nga magsungka sa masunod nga semana antes antes arraignment sang murder case sa Mayo 24.
Suno kay Atty. Trasadas, may ginaasikaso lang si Sorioso para sa iya pagsungka apang wala naman ginkumpirma ni Sorioso kun kay sin-o ini magasungka.
Ginpahayag naman ni Trasadas nga maga-file sila sang motion to post bail.
Nahibaluan nga si Trasadas man ang nagserbe nga legal counsel ni anay San Dionisio Iloilo,Mayor Peter Paul Lopez , iya asawa nga si Sally Lopez kag tatlo nila ka kabataan apang na-dismiss ang murder complaint batok sa ila bangud sa indi bastante nga ebidensya.
Magluwas kay Sorioso, nadutlan man sang kaso si Rudilyn Sumbong nga timbang ni Diergos kag nakahunong na subong sa New Lucena Municipal Police Station matapos nagsungka kasunod sang gin-isyu nga arrest warrant batok sa iya.
Samtang, at-large naman ang isa pa ka suspek nga nadutlan sa kaso nga si Gardo Ibrahim.
