ILOILO CITY – Boluntaryo nga nagsungka sa kapulisan ang suspek sa pagpatay sa isa ka masahista sa Queen’s Court Inn, Barangay Bolilao, Mandurriao, Iloilo City.
Ang biktima amo si Christine Gabayeron, 38, temporaryo nga nagatinir sa syudad sang Iloilo apang residente sang Barangay Bacjawan Sur, Concepcion, Iloilo.
Ang suspek naman amo si Rommel John Celestre y Escasa, alyas “Dikit”, residente sang Barangay Balabago, Jaro, Iloilo City, ginabanta nga naga-edad sang 21-22 anyos.
Sa interview sang Bombo Radyo kay Police Colonel Joeresty Coronica, director sang Iloilo City Police Office, iya ginpahayag nga nag-ako na ang suspek sa krimen.
Suno kay Coronica, may yara sang case conference ang kapulisan agud matipon kag maplastar sang maayo ang tanan nga mga ebidensiya kag impormasyon nga ila nakuha kaangot sa krimen.
Sa interview naman sang Bombo Radyo kay Police Lt. Col. Albert Sy, officer in charge sang Mandurriao Police Station, iya ginpahayag nga pagkatapos nahimo ang krimen sang Sabado sang aga, nagtabok ang suspect sa Guimaras, nagsakay sa pumpboat pa-Valladolid, Negros Occidental kag nagtinir sa iya himata.
Kagab-i sang gindala ini pabalik sa syudad sang Iloilo paagi sa roll-on roll-off vessel.
Ginalantaw sang mga pulis nga wala nagsugtanay sa bayad si Celestre kag ang masahista rason nga natabo ang krimen.
Ginkumpirma man nga isa ka walk-in client ang suspect kag sang Sabado lang sila nagkit-anay sang biktima.
