ILOILO – Ginkumpirma sang kapulisan nga may daan na nga hiligut-anon ang suspek kag ang isa sa mga target sini sa shooting incident nga nagluntad sa San Antonio, Oton, Iloilo, subong nga aga, Enero 3.
Sa interview sang Bombo Radyo kay Pol Staff Sgt Johannes Sorongon, imbestigador sang Oton Municipal Police Station, iya ginpahayag nga may kinagamo na nga nagluntad sang 2019 sa tunga sang suspek nga si Danny Collobong kag ni Renan Jandalajao, sa diin ginpahayag nga ginlampusan ni Callobong sang silhig si Jandalajao.
Kaina sang aga, suno sa otoridad, una nga nagmaoy si Lito Estribor, residente sang San Antonio, Oton, kag iya ginhangkat sang away si Renan Jandalajao.
Sunod nga nag-abot ang suspek nga si Collobong kaupod ang iya asawa kag gulpi lang ini nga nagpaguwa sang 45 caliber pistol nga armas kag nagpangluthang apang ang naigu amo sanday: Jhon Jandalajao, magulang ni Renan Jandalajao, nga naigu sa likod kag wala nga abaga; Juherm Montelibano, nga naigu sa tiyan; kag Ricky Herba, nga naigu sa iya tudlo sa wala nga kamot.
Gilayon nga gin-aresto sang kapulisan si Collobong, kag natalana nga pasakaan sang kaso nga Frustrated Homicide kag Frustrated Murder.
Samtang, suno kay Pol Staff Sgt Sorongon, pasakaan man sang kaso nga Alarm and Scandal si Lito Estribor nga amo ang una nga nagmaoy kag nagtuga sang gamo sa lugar.
Nagapabilin nga yara subong sa Western Visayas Medical Center ang mga biktima.
