ILOILO CITY – Kaso nga double murder ang atubangon sang 19-anyos nga suspetsado nga nagmartilyo sa isa ka pamilya nga Muslim sa sulod sang ila kiosko sa Mandurriao Plaza, Iloilo City kahapon.
Sa interview sang Bombo Radyo kay Police Chief Inspector Juvy Navales, hepe sang Mandurriao Police Station, iya ginpahayag nga ginapreparar na nila ang kaso batok sa suspek nga si Mark Ganava sang Mambagaton, Himamaylan, Negros Occidental.
Sa pagpangusisa sang kapulisan, ginpahayag ni Navales nga may upod pa si Ganava sang ginhimo ang krimen, nga padayon pa nga ginapangita sang kapulisan.
Ang tuman nga kaugot sa mga biktima nga sanday Muammar Ditingki, 29-anyos, lima ka bulan sini nga bata nga si Mohamador Ditingki, kag asawa nga si Asnifah Ditingki, ang isa sa ginalantaw nga motibo sang kapulisan sa krimen.
Suno kay Navales, mahimo nga madugay na nagadumot ang suspetsado sa mga biktima.
Nag-angkon sang fatal nga pilas sa ulo ang mga biktima matapos ginmartilyo.
Nagapabilin naman sa Western Visayas Medical Center ang iloy nga si Asnifah Ditingki nga ginpaidalom sa operasyon.
Ginapahayag nga tatlo na ka semana nga nagabaligya sa Mandurriao Plaza ang pamilya Ditingki.
Tumandok ang mga ini sang Marawi City apang ginapahayag nga lima na ka tuig nagbiya sa Mindanao kag karon nagapuyo sa Zarraga, Iloilo.