JANIUAY, ILOILO – Nagapangayo sang pasaylo ang suspek sa pamilya sang 19 anyos nga dalagita nga ginhimuslan-patay sa Brgy. Abangay, Janiuay, Iloilo.
Sa interview sang Bombo Radyo kay Rhegie Levoit Sr., iya ginpahayag nga hubog lang siya sang natabo ang krimen kag ginapanan-aw niya nga ang biktima nga si Ronalyn Bravio amo ang iya tiayon nga madugay na nga nagbulag sa iya.
Suno kay Levoit, sang adlaw nga natabo ang krimen, nagasundanay sila sang biktima sa dalan kag bangud sa kahulugbon, iya nahimo ang krimen.
Ginpahayag ni Levoit nga himpit ang iya nga pagpangayo sang pasaylo sa pamilya Bravio apang kun indi man siya mapasaylo, iya ini nga batunon.
Ginpanginwala man ni Levoit ang akusasyon nga ginasakit niya ang iya tiayon nga rason sang ila pagbulagay.
Nahibalu-an nga matapos ang pagpasaka sang kaso, nagtabu-ay pa sa Iloilo Hall of Justice ang suspek kag ang pamilya sang biktima.
Bangud sa kaakig, wala napunggan sang pamilya sang biktima nga sakiton ang suspek.
