ILOILO CITY- Nagpangayo sang kapatawaran ang suspek nga ginkuga tubtob mapatay ang isa ka dalagita sa kilid sang suba sa Brgy. San Lucas, Barotac Viejo, Iloilo.
Sa interview sang Bombo Radyo Iloilo kay Bernard Dumacod alyas Alog, tumandok sang Cabuyao, Laguna apang temporaryo nga nagatinir sa Brgy. San Lucas sa banwa sang Barotac Viejo, gin-ako niya nagpalangdulom lamang ang iya panulok matapos ginkaros kag gintiklod ini sang biktima nga si Jenevee Balleza Carrera, 16 anyos sang nasambit nga lugar kag manug Senior High School student.
Apang nanindugan si Dumacod nga wala niya gin-rape kag wala man siya sang plano nga himuslan ang biktima bangud luyag lamang niya ini idul-ong pauli sa ila balay.
Pahayag pa sang suspek, samtang ginakuga niya ang biktima, nagasulod sa iya paminsaron ang tanan nga problema ilabi na sa iya pamilya nga suno sa iya, wala na nagaulikid sa iya.
Handa naman ini nga atubangon ang kaso nga ipasaka batok sa iya.
Kaso nga murder ang natalana nga i-file batok sa suspek apang sa tion nga mapamatud-an sa autopsy nga ginhimuslan niya ang biktima, pasakaan ini sang kaso nga rape with homicide.
