Nagpanindugan ang suspek nga nagtiro-patay sa anay punong barangay sang Brgy. San Rafael, Tigbauan nga nagdepensa lamang siya sang iya kaugalingon.
Ang biktima sa insidente amo si Joevani Triste, residente sang nasambit nga lugar; samtang ang suspek naman amo si John Castro Jr.
Sa interview sang Bombo Radyo kay John Castro, suspek, iya ginpahayag nga masobra anom na ka tuig nga nagalikaw siya sa anay punong barangay bangud man masami sila nga wala nagaintindihanay.
Suno kay Castro, sa amo nga tion, matabok siya kontani sa suba agud nga magpangutang sang isda agud nga ila tiliponan sang iya pamilya bangud kaadlawan niya.
Depensa sini, antes paman siya makatabok sa suba, may yara na sang tatlo ka mga kalalakihan lakip ang biktima nga nagabantay sa iya.
Didto na kag hinali lang siya nga ginhakyawan sang anay punong barangay sang binangon kag gingabutan sang caliber 45.
Rason man kon ngaa gin-unahan niya ini sang pagtiro agud nga makaluwas.
Ginlaragway man sini nga tatlo ka dupa ang ila nangin kalayuon sang biktima sa isa kag isa.
Gin-ako man sang natungdan nga indi niya luyag ang natabo nga insidente bangud pila na siya ka tuig nga nagalikaw sa pagpanghingabot sa iya sang anay punong barangay.
Nagapabilin naman nga yara pa sa Iloilo Prosecutor’s Office ang ebidensya, rason nga wala sa gihapon sang ‘warrant of arrest’ si Castro.
