Nadakpan na ang gwardya nga nagluthang-patay sa isa ka delivery boy sa kilid sang Robinson’s Place- Main, corner Quezon kag J. De Leon Streets, Iloilo City Proper.
Ang biktima amo si Joemar Sanchez, residente sang Brgy. Bitoon, Jaro, Iloilo City kag delivery boy sang Food Panda.
Samtang ang suspek amo si Argie ‘Nunung’ Solis, security guard sang Malayan Bank sa Quezon Street, kabahin sang security agency nga Grabato Investigation Risk Management and Security Service Incorporated kag residente sang Barangay Maria, Laua-an, Antique.
Ang suspek ang nadakpan sa Ilabas, Sibalom, Antique.
Sa interview sang Bombo Radyo kay Police Lt. Paul Joseph Oberio, hepe sang Laua-an Municipal Police Station, iya ginpahayag nga matapos nila mahibaluan ang insidente pinaagi sa social media, gilayon sila nga nagpakig-angot sa pamilya sang suspek sa Barangay Maria, Laua-an, Antique.
Suno kay Oberio, santo sa ila nga imbestigasyon, matapos nagpalagyo si Solis sa insidente, nagsakay ini sa depampasahero nga jeep kag nagpanaog sa San Joaquin, Iloilo sa diin nagsakay ini liwat sang jeep padulong sa San Jose, Antique.
Ginpahayag ni Oberio nga sa ila pagpangusisa sa iloy ni Solis, natabinas ini nga yara ang iya anak sa San Jose, Antique rason nga gilayon sila nga nagpatigayon sang hot pursuit operation.
Temporaryo nga ginpreso sa Laua-an Municipal Police Station si Solis kag natalana nga sayluhon subong nga gab-i sa Iloilo City Police Station 1.
Sa subong suno sa natungdan, ginahulat man nila nga makahatag sang statement ang suspek natuhoy sa natabo nga pagpangluthang.
