MIAGAO, ILOILO – Ginakabig nga ‘armed and dangerous’ ang suspek nga nagluthang-patay sa isa ka pharmacist sa Barangay Mat-y, Miagao, Iloilo.
Ang biktima amo si Pio Javier nga nagapanag-iya sang isa ka botika sa banwa kag bana sang isa ka doctor.
Samtang ang suspek naman amo si Renato Fredecilla, residente sang amo nga barangay kag ginapatihan nga nagasuprer sang nervous breakdown.
Sa interview sang Bombo Radyo kay Police Captain Francis Donne Lomahan, hepe sang Guimbal Municipal Police Station, iya ginpahayag nga wala sila sang tuyo nga patyon ang suspek rason nga nagdangat pa sa pito ka oras ang negosasyon sa tunga nila sang kapulisan.
Suno kay Lomahan, nagpangayo pa sila sang bulig sa utod sang suspek, apang wala ini nagsabat.
Maathag suno sa hepe nga preparado ang suspek nga depensahan ang iya kaugalingon bangud ginbalabagan pa sini sang kahoy kag salsalon ang pirtahan sang iya balay agud indi makasulod ang mga pulis.
Ginpahayag ni Lomahan nga duha ka beses sila nga ginpalukpan sang suspek rason nga nagpangayo na sila sang bulig sa Iloilo Police Provincial Office (IPPO) partikular sa Special Weapons And Tactics (SWAT) team.
Ginpaligad pa ang 30 minutos kag ginsulod ang balay kag didto nakit-an nga may pilas na ang suspek kag na-recover man sa possession sini ang pusil nga ginapatihan .45 caliber pistol.
Gindala pa sa ospital ang suspek, apang gindeklarar sang doktor nga dead on arrival.
