ILOILO CITY- Nakilal-an na ang isa sa duha ka mga suspek nga nagluthang sa manug-ihaw sang karne sa Iloilo City Slaughterhouse sa Pagsanga-an-Tacas-Quintin Salas Road, Jaro, Iloilo City.
Sa interview sang Bombo Radyo kay Staff Sergeant Mary Lye Vencer, imbestigador sang Jaro Police Station, iya ginpahayag nga ang biktima mismo nga si Reynante Villanueva alyas Moroy, 57 anyos, residente sang South San Jose Molo ang nag-identify kay Joel Togado alyas Bornok,30 anyos, nga iya man lang kasilingan amo ang nagtiro sa iya.
Samtang wala naman makilal-an sang biktima ang upod ni Togado nga nagmaneho sang motorsiklo nga ila gin-gamit sa pagpalagyo pagkatapos ginhimo ang krimen.
Naggwa sa imbestigasyon sang otoridad nga may kaakig ang suspek sa anak ni Villanueva apang iya ini ginpaupok sa biktima.
Ginpahayag nga masami nga nagapaisog-isog ang suspek sa ila lugar.
Padayon pa nga ginabulong sa ospital ang biktima nga nag-angkon sang pilas sa pigtot.Nagapabilin naman nga at-large ang duha ka mga suspek.
