𝗜𝗟𝗢𝗜𝗟𝗢 𝗖𝗜𝗧𝗬 — Gintumod sang Iloilo City Police Station 1 nga may mga daan na nga mga kaso-kriminal ang suspek sa pagpangluthang-patay sa anay punong barangay sang Brgy. Ingore, Lapaz, Iloilo City.
Ang biktima amo si Ernie Poral, 65-anyos, residente sang Brgy. Ingore, Lapaz, Iloilo City.
Ang ginaalegar nga mga suspek amo sanday Nilo Guardaya, 39-anyos, kag Jerson Gentapao, 35-anyos, lunsay residente sang Igcocolo, Guimbal, Iloilo.
Sa interview sang Bombo Radyo kay Police Captain, Roque Gimeno III, hepe sang Iloilo City Police Station 1, iya ginpahayag nga lakip sa mga kaso ni Nilo Guardaya amo ang estafa bangud sa extortion, reckless imprudence sa isa ka vehicular accident, kag illegal logging bangud sa nagapangsarahi ini sang mga kahoy.
Suno kay Gimeno, may informant nga nakakilala sa amo nga suspek, rason nga gintul-id sini sa kapulisan ang mga nahibaluan nga impormasyon nga nagtulod man agud matultolan kag masundan ang hulag sang suspek.
Ginpahayag man sini nga si Guardaya ang amo man ang suspek sa pagpatay kay Raniel Lazaro sang Marso sa Villa Anita, Iloilo City Proper.
Kun balikan, nagapungko sa motorsiklo ang biktima nga si Lazaro sang ginpalapitan ini sang suspek kag gilayon nga ginluthang.
Natumod man sang kapulisan ang suspek sa pagpatay bangud man sa may ginbuy-an ini nga mga tinaga gamit ang kinaray-a nga dayalekto.
Samtang indi naman makabig sang talatapan nga isa ka hired gunman ang suspek.
Plano naman nga pasakaan sang Iloilo City Police Office (ICPO) sang kaso nga murder si Guardaya subong nga adlaw.
