Wala pa sa gihapon makilal-an ang suspek nga nagpatay kay Vivencio Bennedick Dequilla Jr., 63, father founder sang Psi Sigma Phi Philippines Incorporated.
Matandaan nga nasapwan nga patay si Dequilla sang Martes, Marso 2, sa katubuhan sa Brgy. PD Monfort North, Dumangas, Iloilo apang kahapon lang, Marso 5, natigayon nga ma-identify bangud yara na ini sa advanced state of decomposition.
Si Dequilla ang nagapuyo gid sa Lanas, Barotac Nuevo, Iloilo apang nagaboard sa Lagubang sa amo man nga banwa.
Sa interview sang Bombo Radyo kay Police Major Joven Arevalo, hepe sang Dumangas Municipal Police Station, iya ginpahayag nga may manabaw nga pilas sa wala nga bahin sang tiyan si Dequilla kag daku nga pilas sa ulo nga posible tuga sang pagkalampos nga amo posible ang rason sang iya kamatayon.
Blangko pa subong ang otoridad sa identity sang suspek kag sa motibo sang krimen.
Suno naman kay Luven Dequilla Jr., hinablos sang biktima, iya ginpahayag nga ulihi nga nakit-an nga nagapaninda sa merkado sang Barotac Nuevo si Dequilla ukon mas kilala nga ‘Dadz’ sang Pebrero 27 sang aga.
Ginapahayag nga may isa ka bataon nga lalaki nga kaistorya si Dequilla nga indi man nila makila-an kun sin-o.
Pagkahapon, indi na makontak ang biktima kag wala man sang ideya ang pamilya kun sa diin nagpadulong ang biktima.
Sa subong, nagalibog ang ulo sang pamilya kun sin-o ang nagpatay kay Dequilla bangud mabuot man ini nga tawo.
Sa pihak nga bahin, hatagan sang P100,000 ang sin-o man nga makatudlo sa suspek nga nagpatay kay Dequilla.
Ang reward money ang ginatanyag sang utod ni Dequilla nga si Vivencio Siaotong Dequilla III.
